BizTech Скопје: Саем за бизнис технологии

Денес, со почеток во 10 часот во Александар Палас ќе стартува првиот меѓународен саем за бизнис технологии во Македонија, BizTech Скопје 2012. Овој меѓународен саем, кој ќе трае два дена, 6-ти и 7-ми февруари, е единствениот бизнис настан за информатичка технологија во овој регион.

Во рамките на саемот ќе се одржи конференција каде гостин говорник ќе биде Рамзес Гаљего, стратег за безбедност и едукатор во Quest Software Simplicity at Work. Тема на првата конференцијата е „cloud computing“, најсовременото бизнис решение, кое ќе биде претставено преку палета на меѓународни предавачи, а во рамките на настанот ќе се одржат и разни работилници и директни презентации од страна на ИТ компаниите.

На BizTech ќе учествуваат водечки домашни и меѓународни компании од секторот за информатички технологии, меѓу кои Microsoft, HP, Verso, Interoute, Mellon Solutions, Seavus, Ipкo, Ekonet и многу други. Овие компании ќе ги претстават своите најнови производи и услуги кои се наменети за бизнис корисниците.

BizTech Скопје 2012 е организиран од Леорон груп, компанија специјализирана за организирање на бизнис настани од Дубаи, со регионална канцеларија во Скопје.