Новата верзија на мобилниот оперативен систем од Google, Android 2.2, со кодно име Froyo, донесува повеќе новитети отколку што беше најавено. Официјално, до сега се објавени само промени на интерфејсот и поддршка за Flash 10.1, како и JIT компилација интегрирана во самиот кернел на оперативниот систем. Последното е заслужно и за импресивните перформанси на Android 2.2, барем судејќи според резултатите од тестовите објавени на страниците на Android Police. Тестирана е моментната, развојна верзија на Android 2.2 и актуелната 2,1 на ист хардвер – Nexus One. При тестот е користен Linpack benchmark, кој ја мери брзината на хардверот. Со актуелниот Android 2.1, Nexus One во Linpack постигнува 6,5 и 7 Mflops, а со верзијата Froyo дури 37,5 Mflops. Зголемувањето на перформансите за 450 проценти е навистина импресивно, сепак за официјални детали и сите новитети поврзани со новиот ОС треба да се почека претставувањето од Google, околу 20-ти месецов.